સાંધાનો દુખાવો દબાવશો નહીં… -

પેઇનકિલરથી દુખાવો દબાય છે, પરંતુ સંધિવા મટતો નથી

➡️ વા માત્ર સાંધાનો રોગ નથી; આંખ, ફેફસાં અને હૃદયને પણ અસર કરી શકે છે
➡️ સવારે લાંબા સમય સુધી સાંધામાં જકડાશ રહે? તેને સામાન્ય વા સમજી અવગણશો નહીં

રાજકોટ: ઘણા લોકો હાથ-પગના સાંધાના દુખાવા, સોજા કે સવારે થતી જકડાશને સામાન્ય ‘વા’ માનીને વર્ષો સુધી પેઇનકિલર દવાઓ લેતા રહે છે. પરંતુ દરેક સાંધાનો દુખાવો સામાન્ય નથી. રુમેટોઇડ આર્થરાઇટિસ (Rheumatoid Arthritis) એ શરીરની રોગપ્રતિકારક શક્તિ પોતાના જ સાંધા પર હુમલો કરતી ઓટોઇમ્યુન બીમારી છે. સમયસર યોગ્ય સારવાર ન મળે તો સાંધામાં કાયમી વિકૃતિ, કાર્યક્ષમતા ઘટવી અને રોજિંદા જીવન પર ગંભીર અસર થઈ શકે છે.
આ રોગની સારવારમાં માત્ર દુખાવો ઘટાડવો પૂરતો નથી, પરંતુ રોગની ગતિને નિયંત્રિત કરવી જરૂરી છે. તેથી વા (સંધિવા)ની સારવાર હંમેશા રુમેટોલોજિસ્ટ (વા અને ઓટોઇમ્યુન રોગોના નિષ્ણાત) પાસે જ કરાવવી જોઈએ. સામાન્ય રીતે પેઇનકિલર અથવા સ્ટેરોઇડથી થોડા સમય માટે રાહત મળે છે, પરંતુ નિષ્ણાતની સલાહ વિના લાંબા સમય સુધી આવી દવાઓ લેવાથી ડાયાબિટીસ, હાડકાં નબળાં પડવા, ચેપનું જોખમ અને અન્ય ગંભીર આડઅસરો થઈ શકે છે.

સંધિવા માત્ર સાંધા પૂરતો મર્યાદિત નથી. કેટલાક દર્દીઓમાં તેની અસર ફેફસાં, આંખો, હૃદય અને રક્તવાહિનીઓ પર પણ થઈ શકે છે. તેથી યોગ્ય તપાસ, નિયમિત ફોલોઅપ અને સમયસર સારવાર અત્યંત જરૂરી બને છે. આજકાલ ઉપલબ્ધ આધુનિક દવાઓ અને સારવાર પદ્ધતિઓથી રોગને લાંબા ગાળે નિયંત્રિત રાખી શકાય છે અને દર્દી સામાન્ય જીવન જીવી શકે છે.

🩺 નિષ્ણાત કહે છે… “દરેક સાંધાનો દુખાવો ‘વા’ નથી અને દરેક ‘વા’ની સારવાર માત્ર પેઇનકિલરથી થતી નથી. સમયસર રુમેટોલોજિસ્ટ પાસે પહોંચવાથી સાંધામાં કાયમી નુકસાન અટકાવી શકાય છે અને દર્દીનું જીવન વધુ ગુણવત્તાયુક્ત બની શકે છે.”
— ડૉ. મોહનિશ પટેલ ( કન્સલ્ટન્ટ રુમેટોલોજિસ્ટ)

🔍 ખાસ જાણો… ● સંધિવા કોઈપણ ઉંમરે થઈ શકે છે, પરંતુ મહિલાઓમાં તેનું પ્રમાણ વધુ જોવા મળે છે.● વહેલી તકે સારવાર શરૂ કરવામાં આવે તો સાંધાને કાયમી નુકસાનથી બચાવી શકાય છે.● માત્ર દુખાવો ઓછો થવો એટલે રોગ મટી ગયો એવું માનવું યોગ્ય નથી.

🚨 ક્યારે તરત ડૉક્ટરને મળવું?

✔ સવારે 30 મિનિટથી વધુ સમય સુધી સાંધામાં જકડાશ રહે.
✔ હાથ-પગના નાના સાંધામાં સોજો અને સતત દુખાવો રહે.
✔ બંને બાજુના સાંધામાં સમાન તકલીફ અનુભવાય.
✔ વારંવાર પેઇનકિલર લેવી પડે અથવા દવા બંધ કરતાં ફરી તકલીફ શરૂ થાય.
✔ સાંધાના દુખાવા સાથે સતત થાક, નબળાઈ અથવા હળવો તાવ રહે.
યાદ રાખો: સંધિવાની સારવારમાં વિલંબ એટલે સાંધા અને શરીરના અન્ય અંગોને કાયમી નુકસાનનું વધતું જોખમ. સમયસર રુમેટોલોજિસ્ટનો સંપર્ક જ શ્રેષ્ઠ ઉપાય.