માત્ર ઈંટ અને સિમેન્ટ નહીં, સંવેદનાઓનો સથવારો એટલે કો-હાઉસિંગ : માત્ર મકાન નહીં, પરિવાર જેવો સાથ: સામાજિક લાભ એટલે કો-હાઉસિંગ
શું તમે જાણો છો, મિત્રો, કે શહેરી જીવનમાં એક નવીન બદલાવ આવી રહ્યો છે? એ છે “કો-હાઉસિંગ”. આ એક એવી રહેવાની વ્યવસ્થા છે જ્યાં તમને પ્રાઇવેટ ઘર તો મળે જ છે, પણ સાથે સાથે સમાજ સાથે સુવિધાઓ વહેંચવાનો અવસર પણ મળે છે. જેમ કે રસોડું, બગીચો, લાઉન્જ, વગેરે. મૂળ ડેન્માર્કથી ઉદ્ભવેલો આ કોન્સેપ્ટ હવે રાજકોટ અને અમદાવાદમાં પણ લોકપ્રિય થઈ રહ્યો છે.
આપણા ભારત દેશમાં સંયુક્ત પરિવારની પરંપરા રહી છે. એ જ પરંપરાને આધુનિક સ્વરૂપ આપવાનો પ્રયાસ એટલે કો-હાઉસિંગ. રાજકોટ હોય કે અમદાવાદ, એકાકી જીવનથી કંટાળેલા લોકો હવે સથવારાની શોધમાં છે. કો-હાઉસિંગ એ જ સથવારો પૂરો પાડે છે. કો-હાઉસિંગની ભૌતિક રચનામાં જોઈએ તો મોટું આંગણું હોય, કોમન હાઉસ હોય, બાગ હોય, અને વર્ક-ફ્રોમ-હોમ સહિતની એમેનિટીઝ પણ હોય તે પ્રકારે આધુનિક જીવનશૈલીની જરૂરિયાતોને સાકાર કરતું બાંધકામ કે જેનાથી સહકાર, વિશ્ર્વાસ વધે છે.
રાજકોટ અને અમદાવાદમાં ભલે કાયદાકીય અને માળખાગત ફ્રેમવર્ક હજુ વિકસી રહ્યું છે, પણ કો-હાઉસિંગ એ ભવિષ્યની જીવનશૈલી બની રહેશે તે ચોક્કસ કહી શકાય. બદલાતા મૂલ્યો અને જોડાણની ઈચ્છાને આ કોન્સેપ્ટ સંતોષે છે.
કેમ રાજકોટ અને અમદાવાદ માટે કો-હાઉસિંગ યોગ્ય છે?
સામાજિક જોડાણ:
શહેરમાં એકલતા વધી રહી છે. ખાસ કરીને વડીલો, સિંગલ પેરેન્ટ્સ, અથવા રિમોટ વર્ક કરતા લોકો માટે. કો-હાઉસિંગ કુદરતી સામાજિક જોડાણ ઊભું કરે છે. રાજકોટમાં શાંત વાતાવરણ હોય કે અમદાવાદમાં ગતિશીલ જીવન, કો-હાઉસિંગ દરેક જગ્યાએ આશીર્વાદરૂપ છે.
આર્થિક લાભ:
શહેરોમાં સ્વતંત્ર ઘરનો ખર્ચ ખૂબ વધારે હોય છે. કો-હાઉસિંગમાં ખર્ચ વહેંચાય છે. સોલાર પેનલ હોય કે સામૂહિક ભોજન, આર્થિક બોજ ઘટે છે. અમદાવાદની સરખામણીમાં રાજકોટમાં કદાચ ખર્ચનો બોજ ઓછો હોય, પણ સમુદાયનો લાભ બંને જગ્યાએ સરખો જ છે.
પર્યાવરણ પ્રત્યે સજાગતા:
કો-હાઉસિંગ સમુદાયો ટકાઉ જીવનશૈલીને અપનાવે છે. સામૂહિક ઉપકરણો, સ્થાનિક વસ્તુઓનો ઉપયોગ, અને કચરો ઘટાડવો – આ બધું શક્ય બને છે.
સૌ માટે:
કો-હાઉસિંગ માત્ર યુવાનો માટે નથી. વિવિધ પેઢીના લોકો સાથે રહે છે. બાળકોને વડીલોનો સાથ મળે, વડીલોને જુવાનીનો ઉત્સાહ મળે.
Leave a Reply